الحلقة الخامسة عشر
اتفقا علي ان يتقابلا في نفس مكانهم
و ما ان رأت شروق آسيا مقبله عليها حتي نست تماما كل ما حدث معها و قالت بثقه صديقه تعلم صديقتها و تحفظها عن ظهر قلب
-آسيا انتي فيكي حاجة !!! مالك ؟!!
ارتمت آسيا فوق الكرسي المقابل لشروق و قالت بإرهاق
-هحكي لك يا شروق , هحكي لك ..
ظلت آسيا تقص علي شروق كل ما حدث معها منذ ان اوهمتها انها قطعت علاقتها بآدم الي لقاءها به
و كانت عين شروق تتسع في ذهول مع كل كلمة تتفوه بها آسيا الي ان انتهت من حديثها كله و نظرت الي شروق برهبه تنتظر ردها
شعرت شروق بالعجز عن الفهم , العجز عن الاستيعاب
كيف حدث كل ذلك ؟!! و متي ؟؟! و لماذا ؟!!
شعرت لوهله انها تشاهد فيلمأً اجنبياً و ليست قصة حقيقية حدثت مع صديقتها المقربه
ظلت صامته لوقت طويل , تستجمع كل ذره عقل تبعثرت من كلمات آسيا الصادمه
الي ان قالت اخيرا بنبره الغير مصدق
– معقول يا آسيا ؟!! معقول يحصل معاكي كل ده و انا معرفش !!! علاقتك بيه فضلت مستمره كل ده ؟؟!! بتكلميه و تبعتي له صورك و تحبوا في بعض !!! و كمان قابلتيه !!! و طلع ……… مشوه !!!!
طب ازاي ؟!! كل ده كان بيكدب عليكي ؟؟!
آسيا ( بألم و دموع ) :
انا كنت مصدقاه اوي يا شروق .. مصدقاه اووي !! حاجة جوايا كانت دايماً بتقول لي انه صادق ! كنت واثقه فيه اوي , عشانه عملت حاجات متخيلتش عمري ابداً اني اعملها , كنت مش في وعيي , لاغيت عقلي و بقيت بفكر و بمشي ورا قلبي و إحساسي و بس ! و كل ده انهار في لحظة !!
لحظة ما شوفنه خوفت و اتوترت و اتلخبط و مبقتش عارفه انا هنا ليه ولا بعمل ايه ولا مين ده !
حسيت اني الفترة اللي فاتت دي كلها كنت مُغيبة و فوقت في لحظة !!
كنت بحلم و صحيت من الحلم , كنت فوووق في السحاب و نزلت علي جدور رقبتي مرة واحده
كنت حاسه اني لو مشيت من قدامه هلاقي كل حاجة رجعت زي ما كانت و هروح البيت اكلمه علي الموبايل اطمنه عليا زي ما كنت بعمل دايماً كأن مش هو الشخص اللي كان لسه معايا !!
شروق : طب مسمعتيهوش معرفتيش كدب عليكي ليه او ايه اللي حصل ؟؟؟؟
آسيا ( بألم ) : مينفعش حد يطعنك بخنجر في قلبك و تبقي بتنزفي و موجوعه و يجي يقولك بهدوء اسمعيني انا هشرح لك انا ليه عملت كده !
ليه دبحتك , ليه كدبت عليكي , ليه غشستك !! ليه ضيعت ثقتك .. مينفهش يا شروق مينفعش !
شروق ( بحزن) : ياااه يا آسيا , حاسه كل ده , كل ده شايلاه لوحدك !! انتي موجوعه عشان كدب عليكي و خدعك و انا موجوعه انك خبيتي عليا !! انااا ! انا يا آسيا تخبي عليا !! طب ليه ؟!!احنا سرنا كله مع بعض , عمرنا ما خبينا علي بعض حاجة , ليه يا آسيا ؟!!
آسيا ( بدموع) :
عشان كنت خايفه , كنت ضعيفه ..اضعف من ان حد يقولي في وشي ان اللي بعمله ده غلط , كنت عارفه اني بتصرف غلط بس مكنتش قادره اواجه نفسي عشان اواجهك و احكيلك !!
وت آدم بالنسبة لي كان مخدر بينسينس كل حاجة , بيخليني مفكرش في اللي بعمله , اهم حاجة اني بسمع صوته و خلاص !
كنت عارفه انك هتبقي ضدي و تغلطيني و تقولي لي لازم اقطع علاقتي بيه زي ما قولتي قبل كده , بس مكنتش اقدر يا شرووق مكنتش اقدرررر , معرفش حبيته امتي ؟!!حبه قعد يتسرسب جوايا من غير ما احس لدرجه اني مبقتش قادرة استغني عنه , عن سماع صوته , عن احساسي انه موجود في حياتي حتي لو من بعيد لبعيد
شروق : طب اديله فرصة يا آسيا , اسمعيه , مش هتخسري حاجة , علي اقل تبردي النار اللي في قلبك دي و احساسك انك مخدوعه , جايز ليه اسبابه , ليه ظروفه , اسمعيه !!!
انا مكنتش هقول الكلام ده لو كنتي حكيتي لي في الاول بس دلوقتي الوضع اختلف , دلوقتي انتي حبتيه ! قلبك دق ! مينفعش تدوسي علي كل ده !
آسيا ( بقوة) : لا هدوس , هدوس يا شروق و هنسي
شروق : مش هتقدري !! او حتي لو حبه تنسي لازم تسامحي و تغفري الاول عشان تقدري تكملي حياتك صح و متحسيش بالذنب و الندم قدام , اسمعيه و بعدين قرري تكملي ولا تنسي
آسيا :
اترجيته كتييير يحكي لي , يقولي اللي مخبيه , يقولي اللي جواه , بس كان بيرفض , مرضيش يا شروق يقول لي , انا كنت حاسه انه تعبان طول الوقت كنت حاسه ان موجوع و انا مش عارفه ايه اللي وجعه , كل اللي كان بيحكي مكنش سبب كافي يخليه خايف و حزين للدرجة , حتي و هو مبسوط و فرحان كان في مراره لازقه في حالقه بتطلع في نبرة صوته , انا كمن بحسها , تنهدت بعمق ثم تابعت باكيه
– لو كان قال لي كنت هقف جنبه , كنت هساعده , و الله ما كنت هبعد عنه يا
شروق بس كان يقولي
و ازداد بكائها و نحيبها لدرجه موجعه للقلب
شروق : اكيد كان خايف يا آسيا , مكنش واثق انك هتقبلي بيه و هو كده
آسيا : لا , لو كان وثق فيا كان عرف اني عمري ما هتخلي عنه , انا قولتها له يا شروق , قولت له مش هتخلي عنك بس قووولي , بس مقالش يا شروق مقااالش , خلاص كده خلصت
شروق ( بترقب) : يعني ايه ؟؟؟!
آسيا :
لا هو وثق فيا و لا انا هقدر اثق فيه بعد كده و مفيش علاقه ناجحه بين اي اتنين ميبقاش اساسها الثقه , احنا كده خلاص , خلاص خلصت ..
شروق : يا آسيا بلاش تعاندي علي حساب قلبك , انتي مقولتيلوش بحبك غير قبل ما تتقابلوا بيوم , مكنش يعرف , كان خايف تسيبيه !!
آسيا ( بعصبيه و انفعال ) :
لا كان يعرف يا شروق , اكيد كان يعرف , اكيد كان بيحس بقلبي و هو بيدق اول ما اسمع صوته , و روحي لما بتروح لما اسمع منه كلمه حبيبتي , و سعادتي لما احس بحبه و اهتمامه , انا كنت خايفة اقوله اني بحبه و كنت بكدب احساسي , بس انا طلعت بحبه من بدري يا شروق , من بدري اوي
شروق : يعني بردو مش هتدي له فرصة تسمعيه ؟؟
هزت رأسها نفياً بقوة
– لااا , هو اللي اختار , وعدته مش هتخلي عنه موثقش فيا , هو اللي اختار مش انا
شروق : يعني انتي مسيبتيهوش عشان شكله يا آسيا ؟؟؟؟
نظرت لها بلوم حزين
آسيا : انتي اكتر واحده عارفاني يا شروق , و عارفه ان دي اخر حاجة تهمني
شروق : ايوة ده في الحالات العاديه واحد يكون شكله عادي , مش وسم مش جذاب , بس ..بس مش مشوه !!!
آسيا :
لو حبيتي حد من قلبك هتشوفيه في عنيكي احلي واحد في الدنيا , انا مخفتش من شكله علي قد ما اتجرحت من كدبه و غشه الفترة دي كلها , انا محستش برد فعلي لما شوفته , محستش انا بعمل ايه , بس كنت خايفة , كنت خايفة من واحد معرفهوش , واحد رسمه له صوره في خيالي مطلعتش هيا , مش عشان اوحش , عشان مطلعتش هي اصلاااً , انا خوفت من واحد معرفوش مش من واحد مشوه , في فرق كبير يا شروق !