بصتلها بتحدي وقلتلها: – انتي لازم تحترمي أختك الكبيرة وتبطلي التجسس بتاعك ده منطقتش بنص كلمة ورفعت الورقة الصغيرة بتاعت “نقرأ الأذكار” وقتها بصتلها بتحدي وقلت “مش هقرأ الأذكار ووريني هتعملي ايه” سابتني بدون ما تنطق ونزلت تنام في مكانها, في الفترة دي بدأت جارتنا اللي كانت هتعمل معانا مشروع تفتح كلام معايا انا وأمي عن ناس كتير الفترة دي بيحفروا وبيلاقوا دهب تحت بيوتهم عن طريق الحاجة نفيسة, وبدأت تحكي ازاي الست دي سرها باتع, وحكتلنا عن ناس في بلدنا فعلا حالهم اتغير تماما وقالت انهم طلعوا دهب من بيوتهم..
وكانت المفاجأة الرهيبة, تاني يوم جت الحاجة نفيسة البيت عندنا, كانت ست فعلا مبروكة وناس كتير بيعملولها الف حساب, قعدت معايا انا وأمي وقالت ان تحت بيتنا في دهب فرعوني, واننا لو وافقنا هتتكفل هي بالحفر وكل حاجة وهتطلعلنا نصيب كبير, وسابتنا نفكر براحتنا ومشيت, بس وهي ماشية قابلت أختي الصغيرة, أختي اللي كانت شايلة القط الأبيض في حضنها وباصة ناحيتها بغضب شديد..
تجاهلنا وجود أختي وبدأت أقنع أمي اننا فعلا محتاجين حاجة زي دي تأمن لينا مستقبلنا, واننا قدام شوية مش هنلاقي ناكل, وطالما الست هتتكفل بكل حاجة إذا هي متأكدة ان فيه دهب تحت البيت, كانت أختي واقفة وملامحها كلها غضب, والقط على ايديها لأول مرة كان بيترعش.. وبدأت أختي لأول مرة تثور وتكـ,ـسر في عفش البيت, وكل اللي فهمناه اننا مينفعش نحفر تحت البيت إطلاقا, لو حفرنا كل حاجة هتـ,ـدمر والبيت هيخـ,ـرب تماما, ورغم اني كنت عاوزة اننا نكمل بس أمي رفضت, رفضت خوفا على أختي اللي كرهتها أضعافا مضاعفة..