الجزء ااثاني من الرواية الفصل الاول والثاني فى فيلا فهد المنشاوى نزلت مليكه من اوضتها وهى السعاده تمتلكها خبطت على باب اوضت سهير وفتحت ودخلت مليكه :- صباح الخير يا ماما سهير :- صباح النور يا حبيبتى مليكه :- يلا يا ست الكل علشان تاكلى وتاخدى العلاج سهير :- مليش نفس يا مليكه للاكل وبعدين انا زهقت من العلاج ده ومش بيجيب نتيجه كام سنه وانا قاعده على كرسى متحرك ومشلوله ايه فايدة العلاج بقى
مليكه :- يا امى يا حبيبتى العلاج ده علشان الحاله ماتدهورش وفهد مش ساكت بيسأل ليكى على احسن دكتور مخصص لحالتك وهيشوف موضوع العمليه دى وان شاءالله هتقومى تمشى وتبقى زى الفل سهير :- معلش يا مليكه تعباكى معايه علطول شايله همى ومش مقصره فى خدمتى مليكه :- ايه اللى انتى بتقوليه ده يا ماما انا اخدمك لحد اخر يوم فى عمرى انتى ام فهد يعنى امى انا كمان ولو اقدر اشيلك واحطك فوق راسى هعملها عمرى ما هتأخر عنك فى اى حاجه تحتاجيها ربنا يخليكى لينا يارب
سهير :- انا كل ما افتكر المعامله اللى كنت بعملهالك ومعاملتك معايه دلوقتى بكره نفسى اوى مليكه :- محدش معصوم من الغلط يا ماما وكلنا بنسئ الظن بى ناس كتير ونرجع نندم لما نعرفهم كويس المهم انتى معانا دلوقتى وفى وسطنا ويلا بقى علشان تاكلى سهير :- ربنا يخليكى لاولادك يارب وتفرحى بيهم زى ما انتى مفرحانه تملى مليكه :- اه صح فهد بص عليكى قبل ما يمشى سهير :- ايوه يا بنتى مليكه :- ماشى يلا بينا يا سوسو
سهير :- هههههههه سوسو طالعه من بؤقك زى العسل بقالى كتير اوى محدش نده عليا بالاسم ده مليكه :- ياسلام ده انتى احلى سوسو وزقتها بالكرسى وراحت بيها بره الاوضه وحضرت ليها الاكل ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، فى فيلا مها واسر فى اوضت نوم مها اسر :- صحى قبل مها وبص عليها لاقها لسه نايمه مشى صوابعه براحه على وشها مها :- حست بأيد اسر فتحت عينيها وابتسمت وقالت صباح الخير اسر :- صباح النور على احلى عيون
مها :- هههههه انت علطول كده بدلعنى اسر :- سبحان الله اول مره اشوف واحده بتشتكى من دلع جوزها ليها ده الستات هيمـ,ـوته ويسمعوا كلمه حلوه من اجوازهم مها :- مش بشتكى على فكره بس اعمل حسابك انا اخد على كده ومش هسمح ليك تبطل دلع فيا العمر كله اسر :- وانا مقدرش مدلعكيش ده الدلع اتخلق علشان عيونك انتى مها :- بحبك اوى يا اسر انت نعمه كبيره من ربنا ليا
اسر :- وانتى عمرى كله يا مها انتى حبى الاول والاخير انتى حب الطفوله اللى عاش فى قلبى وقعد يكبر مع الايام لحد ما ملا قلبى وكيانى انا لو مكنتش اتجوزتك كنت همـ,ـوت كنت هعيش العمر كله وانا منتظرك تبقى ليا وشاور على قلبه وقال ده ملكك انتى وبس مها :- باسته فى خده وقالت بعد الشر عليك ده انا اللى من غيرك امـ,ـوت اسر :- ربنا يخليكى ليا وميحرمنيش منك ابدآ مها :- هقوم بقى وانت كمان قوم هتتأخر على الشغل
اسر :- شدها فى حضنه وقال بقولك ايه ما بلاش شغل النهارده وتعالى اقولك كلمه سره على شـ,ـفايفك مها :- لالالا قوم يلا بلاش كسل اسر :- يابت هتندمى لو مسمعتيش اللى عايز أقوله ليكى مها :- لا شكرآ قوم شوف مصلحتك اسر :- بلاش تقطعى برزقك وتعالى فى ناس مش طايله مها :- ههههههههههه برضه لا اسر :- انتى حره ملكيش فى الطيب نصيب وقام من على السرير ودخل الحمام اخد شاور واتوضه وخرج لبس هدومه واده فرضه ونزل
مها :- كانت حضرت الفطار اسر :- قعد اكل وبعدين قام باس مها فى راسها وخرج من باب الفيلا وركب عربيته وراح على شركته ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، فى شقة مى ومازن صحيت مى من نومها على صوت المنبه قامت طفت المنبه وبصت لمازن وقالت مى :- مازن اصحه يلا علشان متتأخرش على الشغل مازن :- ماشى يا مى روحى حضرى الفطار على ما ادخل الحمام مى :- حاضر مازن :- مالك مى :- ولا حاجه مازن :- باين عليكى فى حاجه عايزه تقوليها
مى :- بأبتسامة حزن هو انت ليه كده يا مازن مازن :- انا كده ازاى مى :- بحس تملى انك شايفنى خدامه وبس تملى طلبات طلبات بقى كلامك معايه محدود من يوم شهر العسل وانت مش بدلعنى اول ما تفتح عينك حتى مش بتقولى صباح الخير اول كلمه تنطقها بتبقى بتأمرنى اعمل حاجه انا تعبت من المعامله دى تملى اقول استحملى علشان ولادك بس خلاص فاض بيا انت حتى لما بتاخد حقك الشرعى منى بتبسط نفسك وتدينى ضهرك وتنام كانى واحده مجرده من المشاعر ليه بتعمل معايه كده يا مازن
مازن :- يا مى الكلام والرومانسيه دول للناس اللى مرتاحين فى عيشتهم لكن انا واحد طافح الكوته علشان اجبلكم القرش اللى يعيشكم عيشه كويسه طول النهار شغال باجى فاصل ببقى عايز اكل لقمتى وانام علشان اصحه فايق مى :- لا يا مازن عمر الرومانسيه والحنيه ليها علاقه بالفلوس والعيشه ياما ناس كتير عايشه فى اوضه تحت سلم بس عايشين مرتاحين وبيحبو بعض الواحده مننا مش محتاجه فلوس ولا محتاجه حاجه قد ما بتبقى محتاجه لحضن يحسسها بالامان براجل يحسسها انها مختلفه عن الستات كلها حتى لو هى عاديه بس فى عيونه ملياها
انا نفسى تكون حنين عليا تخدنى فى حضنك تسمعنى كلمتين حلوين انسا بيهم تعب وشقه طول النهار فى البيت ومع العيال عايزه احس ان انا بنأدمه وانا معاك فى العلاقه مش مجرد اله ترضى بيها رغباتك وخلاص مازن :- وايه يعنى اللى جد يامى اليومين دول علشان تطلبى التغير دلوقتى
مى :- اللى جد يا مازن أن العمر بيجرى واليوم اللى بيفوت من عمرنا مش هيرجع تانى وانا بقيت عباره عن اله فى البيت طول النهار شقيانه واخر الليل بنام جنب راجل مش حاسس بيا نفسى اعيش يومين حلوين نفسى احس ان انا بنأدمه وليا اهميه نفسى اعيش مبسوطه مع الراجل اللى حبيته نفسى تنده ليا وتقولى يا حبيبتى نفسى ارجع اضحك من قلبى زى زمان رجع مى اللى انت اخدها وغيرتها من كتر احباطك فيها
مازن :- مى اللى عايزه تعيش عمرها ما بتبص لتفاهات دى مى :- بصدمه تفاهات انت بتسمى الحب والمشاعر تفاهات مازن :- ايوه اتكسفى من نفسك حب ايه ومشاعر ايه اللى عايزه تعشيهم انتبهى لعيالك وربيهم كويس وفكرى فى مستقبلهم مش تقولى رومانسيه قومى يا مى وبلاش تتفرجى على مسلسلات تركى وهندى كتير هما دول اللى لحسو مخك وقام دخل الحمام وسبها مى :- بصت على مكان مازن بصدمه ودموعها نزلت منها وقالت بتسمى الحب تفاهات أكبر غلطه فى حياتى انت يا مازن ومسحت دموعها وقامت خرجت من باب الاوضه وراحت المطبخ تحضر الفطار
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، فى فيلا باسم ونورهان صحى باسم من نومه لاقه نورهان صاحيه ورايحه جايه فى الاوضه باسم :- صباح الخير نورهان :- بتعب صباح النور باسم :- مالك يا قلبى نورهان :- ما نمتش طول الليل عندى مغص جامد وخبط فى ضهرى باسم :- ده طبيعى فى التاسع يا نورهان نورهان :- عارفه يا قلبى بس الدكتور قال لما يبقى الطلق وراه بعضه كده يبقى ولاده وانا حاسه نفسى انا انا هولد النهارده باسم :- تحبى اوديكى للدكتور يكشف عليكى ويطمنا