من شوية كنت بكشف على واحدة في العيادة بتاعتي وكنت بمارس هوايتي المفضلة كالعادة، الهواية اللي ممكن تقول هي أقذر حاجة ممكن يعملها طبيب نِسا في حياته، كنت مشتري كاميرا في حجم عقلة الصباع وبمسكها في إيدي مع سماعة الكشف واصور عورات الستات اللي بتيجي تكشف، الكاميرا كانت بتصور ١٠ صور في الثانية الواحدة، وده خلاني أعمل ألبوم صور كامل لكل ست كشفت عندي خلال التلت شهور اللي فاتوا..
بس ده مش مرض فيا ولا حاجة، ده انتـ,ـقام، انتـ,ـقام بسبب حدث كان كفيل يدمـ,ـر حياتي كلها، تخيل تشوف مراتك اللي أنت حاربت الدنيا كلها عشانها بتبعت صور ليها لواحد تاني، صور عارية بالكامل، تخيل كم الجنون اللي هياكل في راسك لما تتخيل إن راجل تاني شافها وعرف كل تفصيلة فيها، حاجة كفيلة تدمر أي راجل..
وتحديدًا لما تكون مراته دكتورة، واحدة قاطع عشانها أبوه وأمه وتمسك بيها تمامًا، رغم إني جابولي حافظة القرآن والمتدينة والمحترمة، بس أنا دكتور، ومكنتش ناوي اتجوز غير دكتورة وبس حتى لو الكل حذرني منها، وكانت النتيجة بعد سنة واحدة من الجواز، بتتكشف لشاب مراهق أكتر ما بتتكشف ليا، كانت بتخجل معايا ومعاه لا..
وبعد الطلاق فضلت النار تزيد جوايا يوم بعد يوم، لحد ما قررت أنتقم من الدنيا كلها، وبقيت بصور أي واحدة بكشف عليها، كان ده بيهدي النار في قلبي كتير، وبيخليني اتقبل فكرة إني كنت مخدوع ومُغيب ومش مالي عنيها، ومين هتكشف عند دكتور نسا إلا لو جوزها مش مالي عنيها، اقنعت نفسي بده عشان مفقدش ثقتي في نفسي للأبد، والست هتفضل خـ,ـاينة ولو معاها أحسن راجل في الدنيا..
لحد ما جت الست دي، كانت غريبة ونظراتها شاردة، فيه هالة حوليها تخوفك من إنك تبص ناحيتها، فما بالك تشوف عورتها وتصورها، مش هكدب لو قولت كنت خايف منها، بس مكنش عندي استعداد اتنازل، خاينة زيها زي غيرها.. اشتكت من اضطراب الحمل وطلبت منها نعمل سونار، ومددت ع السرير وهي بتردد (لا حول ولا قوة إلا بالله العلي العظيم) وده خـ,ـوفني منها أكتر، ألف حاجة قالتلي لا، بس حاجة واحدة قالتلي صورها، وأنا للأسف استجبت للحاجة دي..
وصورتها حوالي ٢٠ صورة في ثانيتين، وكتبتلها على أدوية تثبت الحمل ومشيت، وبعدها مقدرتش أكمل كشف لأني صدعت أوي وروحت نمت زي القتيل.. لما صحيت لقيت الجو ليل، شربت المشروب بتاعي اللي عبارة عن ويسكي، وبدأت اتأمل صور المرضى، واحدة ورا واحدة لحد ما جبت صور آخر مريضة، وبدأت اتأمل الصور.. بس الغريب إني لاحظت كف إيد ظاهرة ع بطنها، وكأن الجنين ساند عليها، رغم إنها حامل في الثالث يعني استحالة تكوين أطراف في الوقت ده، كملت مع الصور لقيت علامة وجه مثلث واضح اوي من جوة بطنها، كأن الجنين بيحاول يخرج من الست ووجهه مثلث بطريقة حادة..
غصب عني اترعشت وأنا بشوف الظاهرة المريبة دي، ولما وصلت لأول صورة لمحت حروف على بطن الست، كبرت الصورة على أد ما أقدر وحاولت اقرأ أ ن ا ش ا ي ف ك اي ده !! هو مكتوب (أنا شايفك) جسمي كله اتكهرب لما قرأت الكلام وروحت محدد كل الصور وحاذفها، وقمت وأنا مقرر أبطل اللي بعمله ده لأني اكتشفت إن فيه حاجات مرعبة أكبر من فكرة الخـ,ـيانة.
ونمت تاني، نمت عشان أحس بالليل بحاجة بتزحف على رجلي، وكنت مشلول وكأنها حالة جاثوم، بس كنت شايف، شايف طفل لسة مولود وجسمه كله لزوجة وبيزحف عليا، وصوت السائل اللي بينزل منه بيرن في وداني، فضلت أشهق زي اللي روحه بتخرج منه لحد ما في النهاية فقت وصحيت، مسكت موبايلي وكانت الصدمة.. كل الصور اتمسحت إلا صور الست دي، حاولت امسحهم تاني وتالت ورابع، نزلت لمحل موبايلات فرمت الجهاز كله ولما روحت لقيت الصور تاني، وعرفت إني اتلعنت، لعنة تتبع العورات، والله أعلم هخرج منها تاني ازاي..
وبدأ الجحيم يتجسد ليا على الأرض بعد ليلة واحدة، لأني صحيت تاني ليلة على صوت واحدة بتتألم وبتزووم، صحيت مرعوب وفضلت أدور في الشقة على مصدر الصوت لحد ما عرفت إنه جاي من الحمام، فتحت الباب وشعر جسمي كله واقف عشان اتفاجئ بيها، الست إياها، نايمة في البانيو وجسمها غرقان دم وبتولد وعمالة بتنازع، وأول ما فتحت الباب بصتلي وفضلت تستغيث عشان أنجدها، وأنا واقف قدام المشهد زي الصنم، لحد ما حسيت بحاجة بتلمس رجلي، بصيت لقيت طفل بيزحف شكله بشع وسنانه ضخمة، وعضني من رجلي، وصرخت، صرخت ووقعت في الأرض..
وسمعت همساته، كان بيقولي أخلي أمه تولد الليلة وإلا هيدخل في بطني أنا، ومتحملتش لحظة تانية ووقعت من طولي، ولما صحيت كان فيه وجع في بطني لا يطاق، دخلت الحمام لقيت دم بينزل مني، دم اسود، جريت على المستشفى وبعد فحوصات وصراخ ووجع اتقالي إن فيه ورم غريب في المعدة مفيش ولا دكتور عارف سببه، والورم مزروع في جدار المعدة كلها، ومفيش دكتور هيغامر ويشيله لِأن فيها مـ,ـوتي..
وبدأت معاناة، حمام دم، قيئ دم، بقيت عايش على المحاليل وبس، كوابيس لا تطاق وبسمع صوت الطفل من بطني عايز يخرج، هيخرج منين وازاي إلا لو هيقطع بطني كلها، وافتكرت الست، جبت اسمها من تذكرة الكشف وعرفت عنوانها وروحت.. وعرفت إنها ست تقية، كل الناس بتشهد بأخلاقها، اتعملها سحر أسود وشربته في العصير، وماتت بسببه هي والجنين، وعرفت إني لسبب ما اتلعنت بالسـ,ـحر ده واتأثرت بيه، بقيت عامل زي الهيكل العظمي وبدعي ربنا أمـ,ـوت انهاردة قبل بكرة.
لحد ما حد قالي إن اللي فيا ده مش مرض طبي ونصحني أزور شيخ، وروحت بالفعل، روحت وأنا ببكي وبقول يا رب بأعلى صوت، وبعد رقية طويلة تقيأت شلال دم اسود، واتنفست، اتنفست زي اللي كان بيغرق وطلع أخيرًا للنجاة..
تجربة متمنهاش لحد في الدنيا كلها، بس الدرس منها قاسي اوي، أخطائك مسئوليتك لوحدك، وأنا اخترت الدكتورة عشان مركزها وتجاهلت الدين والأخلاق، وكان لازم أتحمل نتيجة خطأي لوحدي، إنما أحمل الناس معايا الوِزر وانتقم لنفسي فيهم حتى لو مظلوم فده الهـ,ـلاك، مش معنى إنك اتظلمت يبقا تظلم، أو اتسـ,ـرقت تسـ,ـرق، او ابتُليت في عِرضك يبقا تنتهك أعراض الناس، تحمل الظلم أهون ألف مرة من إنك تبقا ظالم، وزي ما قالوا زمان يا بخت من بات يوم مظلوم ولا بات في يوم ظالم وإياك ثم إياك من تتبع عورات الناس..
(من تتبع عورات الناس تتبع الله عورته) بقلم: أحمد محمود شرقاوي ……….